West Garo Hills ni Deputy Commissioner Jagdish Chelani mijal salni bako Tura songjinmani Area Development Committee ni President aro Secretary rang, Tura Municipal Board, District Transport Officer ni official rang, District AH & Veterinary Officer, MeECL ni Executive Engineer aro DSP Headquarter baksa bakrime Tura songjinmao dingtang dingtang niroke ka·na nanggni kamrangni bidingo chanchirimangaha.
Ia tom·e chanchirimanio mongsongbate Tura songjinmao jabol galanirangko nirok simsakna, matburingrangko ripingani, wilwilao moila ong·ani aro dingtang dingtang nangarangni gimin chanchirimangaha. Una agreba neng·nikanirang jekai parking na biap, manderangko naljoke rakkiani, bijoli aro re·a doanirangni bidingoba Area Development Committee rang janapaniko dakangaha.
Ia neng·nikanirangoniko naljokatna aro Tura songjinmani namroro silroroanina chanchirime apsan bakrime mikkangchi bimchipe kamko ka·na ja·ku dena gita miksonganiko dakangaha.
