Dainadubi jolo mobile network rangko watanio nambatatna gita ua jolo songdonggipa manderangni palo Dainadubi Circle Youth Organisation (DCYO) dolrang NGH a·jani Deputy Commissioner na Memorandum on·e u·iataniko dakangaha. Dainadubi jolo songdonggipa manderangna mobile network rangko tik ong·e watjani a·selo neng·nikanirangko man∙enga ine uamangni chittio see janapataha.
Dingtang dingtang company rangni mobile tower rangko songgenchimoba bang·a biaprangona network rang sokkugijaniko niknagita man·enga. Adita biaprango jekai Sonakari, Bangsi Apal, Bangsi Apal Blisa, Chima Apal, Gairong, Woodland aro gipin songrango Airtel, Jio aro BSNL tower rangko songmangenchim ong·oba komibee network ko watani a·sel bang·a manderangna neng·nikaniko man·enga ine DCYO janapataha. Unbaksa bijoli siahaode mobile network ba dongpajaenga ine company rangni kam ka·anio tik ong·gijaniko DCYO dol u·iatangaha.
Assam a·dokni sima ari jolo donggipa songrango Assam ni watgipa network ko jakkalna man·genchimode, Meghalaya a·dokna jolo donggipa tower rang maina tik ong·e watna man·jaenga ine sing·doanirangona sokbaaha. Ia neng∙nikanirangko daito ra·gipa dilgiparang nanga ja·kurangko de·china gita DCYO dolrang Memorandum o janape mol·molaniko dakangaha.
