Da∙al salni bako WGH a∙jani Tura Don Bosco College o Red Ribbon Youth Festival 2023 ko Garo Hills jolna ong∙atangaha. Ia tom∙bimonganiko Meghalaya AIDS Control Society (MACS) Shillong, Don Bosco College Tura-ni Red Ribbon Club aro National Service Scheme (NSS) nangrime Nodal Officer, Dr. Barbara S. Sangma aro Dr. Meuller Beul M. Sangma ni nirokanio ong∙atangaha. Ia tom∙bimonganiona MACS, IEC Shillong ni Deputy Director Majoy M. Lanong aro STI/RTI, Senior Specialist, Anti-Retroviral Therapy (ART) aro Integrated Counseling & Testing Center (ICTC) ni Nodal Officer Dr. Rajamoni R. Marak mongsonggipa sokgipa ong∙aha.
Tom∙anio Tura Christian College (TCC), Tura Government College (TGC), Loyola College Williamnagar aro Tura United Christian Academy College (TUCA) ni chatro chattrirang re∙bae bakko ra∙angaha. Red Ribbon Youth Festival 2023 ko apsan ku∙cholsan nangrime kam ka∙e HIV/AIDS sabisini gimin agantalate mikrakataniko on∙an baksana sabisini gimin ma∙sisretanirangko talatna miksonge ong∙atenga ine Don Bosco College ni Principal Fr. Bivan Rodriques Mukhim tom∙aniona re∙bagipa sakantikon rimchaksoa gnang aganangaha. Ia tom∙bimonganio Speech, Quiz, Drama unbaksana Folk song singing competition rangkoba ong∙ate bon∙kamao bakko ra∙giparang baksana chegiparangna boksisrangko on∙angaha.
