Chang 17 gipa North East India Festival ko Italy a·songni Milan songjinmao ong·atanio India a·songni dam chet Northeast a·dokni nitobegipa ganding chindingrangko tarigipa manderang bakko ra·e an·tangtangni changa sapaniko jakkale dakmesokangaha.
Ia ganding chindingrangko mesoksusaaniko dakanio Shillong DSEFH ni co-founder Daniel Syiem ‘The Orchid’s Tale’ ingipa kattao pangchake an·tangni changa sapaniko jakkale Meghalaya ni mongsonggipa jatrang jean Khasi, Jaintia aro Garo jatrangni ganding chindingrangko da·ororoni gana chinani baksa tarie mesokanirangko dakangaha. A·chikrangni dakmandaniko tarigipa ganding chindingrangkoba ia festivalo aditan mesokanirangkoba nikangnagita man·angaha.
Syiem ni jatni ganding chindingko nitobee tarie mesokanina ua festival o bakko ra·giparang uni kamrangna kusi ong·e katchaaniko on·angaha aro ian an·ching a·dokni jatrangna rasong chaanikoba ra·baaha.
