A∙doko Jal Jeevan Mission (JJM) ko sorkarini jako ra∙e kam ka∙anirangko talatanio PHE Minister Marcuise Marak Meghalaya a∙doko JJM ni gita 2024 bilsini March jao nokantiona rongtalgipa ringani chirangko sokatna kam ka∙aniko matchotate on∙a jotton ka∙anggen ine aganangaha. Department ni a∙doko chirangko ra·bae on∙anio chu∙gimik lakh 3,72,824 nokrangna 2023 bilsini September 6 tarikona matchotaha ine Marak parakangaha. Ia kamrangko department ka∙nagita ma∙mong sorkarini Ministry of Jal Shakti ni dongimin niamrango pangchake ja∙rikenga ine ua aganangaha.
Garo Hills o JJM ni kamrang EGH a∙jao 78.39 percent, NGH o 67.12 percent, SGH o 62.01 percent, SWGH o 75.94 percent aro WGH o 54.57 percent nigita da∙o dipet matchotaha ine Marak u·iatangaha. JJM ni ning∙o kam ka∙anirang Meghalaya a∙doko chu∙gimik 57.22 percent mangnigita matchotaha aro department man·a dipet ta·rake kamrangko ka∙na raken krengenga ine Marak aganangaha.
Songrango chini rongtalaniko nirokna department ni gita ASHA, Anganwadi, skulo skigiparang aro Village Water & Sanitation Committee (VWSC) rangna skie on∙enga ineba Marak aganangaha. Unbaksana chirangko porikka ra∙chakani damgittam biaprangko rongtalgipa ringani chiko on∙gipa ine National Accreditation Board for Testing & Calibration Laboratories (NABL) ni ra∙chakaniko Marak parakangaha.
