Da∙al salni bako GHADC o kam ka∙gipa Non-Gazetted Employees Association (NGEA) aro pilak ka∙rimskarang ja 31 ni dormaharangko man∙kujaengani gimin tom∙bimonge GHADC ni CEM Albinush R. Marak ko gronge chanchirimaniko dakangaha. Ia chanchirimanio GHADC ni CEM uamangna chu∙gimik dormaharangko on∙a man∙jaoba jagniniko on∙chengna ku∙chake ra∙angaha ine koborna parakataha. CEM ni ku∙chakagita ia antini gisepo sakanti kam ka∙giparangni bank account rango tangkarang napja ong∙ode re∙baenggipa Sombar salo apsan ja∙kuko de∙angtaigen ine NGEA ni President Brithen N. Sangma aganangaha.
Bang∙a GHADC o kam ka∙giparang jagnini dormaharangko ra∙chakna jechake dabianirangko dakengon CEM an∙tangan ong∙katbae council o tangka paisarang dongkujaengani gimin jagnini dormaharangko ra∙chengchina mol∙molaniko dakangaha. Brithen N. Sangma ni agananigitade council ona crore 6 tangkarang sokbanagipako uamangni dormahana chame donmanaha ine GHADC ni Chairman Rakesh Sangma ni janapgimin kattarangkoba u·iatjolangaha. Ia tangkarang chu∙gimik apsan somoio sokbajanaba donga ine Chairman uamangna u∙iatangaha jekon Brithen Sangmani aganangani gitade December aro January jao jagniprakni dormaharangko on∙taina Chairman ku∙chakangaha ine parakataha.
