Garo Hills Environment Protection Society (GHEPS), Garo Hills-o gimaangenggipa buring bolgrimrang, chiring chibisikrang, do·o matrang aro samtangtangtango ong·telaigipa gamrangko ripingna aro tangchaatpilna rakbee kamrangko ka·e Environment Sustainability awareness program-ko mijal salni bako North Garo Hills-ni Resubelpara Mini Stadium-o ong·atangaha. Ia program-ko ong·atanio North Garo Hills-ni SP, DSP aro dingtang dingtang sorkarini official-rang, skulni chatro chatrirang, toromni dilgiparang aro songsalni manderang dongpae bakko ra·angaha.
GHEPS-ni President Dr. Merril N. Sangma, a·chik a·songo ong·telaigipa bakrang jekai buring bolgrimrang, do·o matrang, ma·manti buringo donggipa jonturang aro chiring chibisikrangko mikkangchi tangkame rakkiangna aro gamchate ra·na miksonganiko ia program-o agantalate on·angaha. Garo Hills-ni kona noksikrango bol wa·arangna ka·sagija nisiate bon·atengani a·sel a·chik a·songo bol wa·arang namen komiroroangengani gimin chiring chibisikrangni tipanganiko nikna gita man·engaha. Iandakgipa program-rangko ong·atanichi, manderangko bol wa·ani gamchataniko agan-talate on·an baksana mikrakataniko on·a nangenga. A·chik a·songni gimagimin bol wa·arangko gipatpiltaina miksonge ia program-ko ong·atenga ineba Sangma parakangaha.
Garo Hills-o bol wa·arang ta·raken komiangani a·sel a·chik a·songo chaktogija ding·ani a·selo Garo Hills-o Skul aro college-rangko chutti watna nangaona sokpilengaha. A·chik a·songo tangsekgilgil nitogipa a·brirang aro rona rotogipa biaprang, chiring chibisikrang tipangahani gimin, namgipa ringani chirangko mikkangchi man·a neng·ani ong·gen ineba aganangaha. Bol wa·a chiring chibisikrangko tange rakkina an·ching sakantini daito ong·a jedakode mikkangchi dedrang su·drangni janggi tanganio neng·nikanirangko chagrongna nangjawa ine Sangma bak ra·enggipa manderangna didianiko aro ku·monganiko on·angaha.
