Congress dol ni manderang gnigipa changna Bharat Jodo Yatra ko 2024 bilsi Lok Sabha election na skang ong∙atna miksongenga. Gital bimang dakgimin Congress Working Committee (CWC) ni Hyderabad-o ia jani 16 aro 17 tariko skanggigipa tom∙bimonganiko ong∙atna manchiangaha.
Battangimin bilsio Congress dolni gitcham President Rahul Gandhi September ni 7 tariko Kanyakumari oni Srinagarona January 30 tarikona sal 136 na re∙jomaniko ong·atangaha. Ia bilsio Congress dolni memberrang jajaanirangko parakataha maina adita salrangna skang Maharashtra-ni Congress Chief Nana Patole Yatra ko Gujarat ni Porbandar-oni Meghalaya-o bon·chotatna ine kobor ra·timgiparangna ku·watangmanaha. Indiba Partyni gipin memberrang December 1 tarikoni Yatra ko Assam oni a∙bachengate Gujarat-o bon∙chotatna miksongangenganiko parakatskaaha. Ia re·jomaniko Indiani dam 12 re·jomgimin a∙jarangko watchange gital biaprango re∙jomaniko dakangskagen aro ja∙achisan ong∙aigija garioba re∙aniko dakna miksongenga ine Congress dolni saksa dilgipa aganangaha.
Rahul Gandhi gnigipa changna a·song gimiko re·jomaniko dakengon ia bilsi ni gisepon Manipur, Ladakh aro Delhi ni Azadpur o donggipa me∙su paldam dokanrangchi re·anganikoba Bharat Jodo Yatra ni bak ine chanangaha. Congress dolni President Mallikarjun Kharge election ong∙atna skang mangmang Yatra ko ong∙ataniara dam bonga a∙jarango election na tarisamsoanirango neng∙nikaniko chagrongnaba donga ine suk ong·gijaniko agane kobor ra∙timgiparangna parakataha.
