West Garo Hills Rongram Block-ni ning∙o donggipa Silsotchigre songo Pudina rokomsa jatko ge∙ani cholrangko skie on∙a salsani training programko ong∙atangaha. Ia programko INR ni Bio-Resource dol MegLIFE baksa nangrime ong∙atangaha. Ia trainingo similgipa samsini jatrangko ge∙achi aro a∙arangko ripingna miksonganiko ma∙siate on∙a ong∙atangaha. Pudinani jatrangko ge∙anichi a∙ani bimangko namdapata, a∙ani chijimaniko rakikame dongata aro wachikarini somoirango a∙ani ruronganiko champengatna dakchakaniko on∙a.
Ia rokomsa samsirangko ge∙anichi samtangtango dongenggipa pilak janggi gnanggiparangna namgniko on∙an baksana a∙ani namgipa gunko ripingna dakchaka aro chi man∙aniko naljoke rakkianiba ong∙a ine programo talate on∙angaha. Ia skie ra∙ani cholrangko ra∙baaniara mikkangchi ge∙e game cha∙anio maming nosto ka∙ani donggija gamtaitaie daksninge cha∙na man∙a amaniko mikrakatanigitaba ong∙a. Salsana skie on∙gipa programona Silsotchigre, Donsimagre, Chiwategre, Romba Adinggre, Chokagre aro Timbogre songni gisiko nanggipa sak 60 manderang dongpae skie ra∙anganiko nikangaha.
