A∙song gimiko India ni President, Draupadi Murmu ni a∙bachengatna janapatgipa Ayushman Bhava Campaign ko State Convention Centre, Shillongo mijal salni bako oprake on∙angaha. Ia programona a∙dokni Governor Phagu Chauhan, Chief Minister Conrad Sangma, Health Minister Dr. Ampareen Lyngdoh aro Health Department ni senior official rang dongpae bakko ra∙angaha.
Ayushman Bhava ma∙mong sorkarini ra∙bagipa Health scheme ong∙a jeon bang∙a sanna bannani cholrangko altuae man∙a, sagiparangko tangka gri porikka ra∙e sanna, surgery aro hospitalrango donganina tangka paisachi dakchakaniko on∙angna miksonggipa ong∙a. Ayushman Bhava ni ning∙o, Ayushman Apke Dwar 3.0 nigita Ayushman card rangko man∙a kragiparangna suale on∙anggen. Ayushman Bhava-Health & Wellness Centre (AB-HWC) aro Community Health Centre (CHC) rango antirikkit Health Mela rangko ong∙atangan baksana Ayushman Sabha ko songrango ong∙ate bang∙a Health scheme aro dakchakani bidingrango u∙iataniko on∙angjolgen. Sak hajal 60 na bate ia scheme nigita Ayushman card rangko on∙angnaba tik ka∙angaha.
Conrad Sangma, program o manderangna aganengon, nangchongmotgipa sanna bannanirangko ja∙pangoni namatna man∙jagenchimode sorkarini kam ka∙ani namgni dongjawa ine parakangaha. A∙dokni chu∙gimik tang∙doanina sorkari pilak a∙barango dingtang dingtang songsalo gadangni nanganirangna jekai skia poraiani, sanna bannani aro ge∙a gamanirango cholrangko taria. Ia pilak kamrangko chu∙sokatnagita songsalo songdongenggipa manderang bakrimpaaniko on∙jaode mikkangchi re∙mikkanganio ja∙guaniona sokanggen ineba Sangma aganangaha.
Ia somoio Sangma songadam nokadamrango sanna bannani cholrangko sokatna kam ka∙enggipa Village Health Council (VHC) rangna gong hajal 20 tangkarangko on∙e dakchakna ku∙wate ra∙angaha. Sanna bannaniko namdapatna a∙jani hospital rango nangchongmotgiparang jekai chi, bijoli, samrangko sokatani, kam ka∙giparangna skie on∙ani aro jakkalna nanggipa bosturangko ra∙bae on∙a sorkari niangaha ine Sangma janapangaha. Unbaksana Sub-Centre, PHC aro CHC rangko namdapatanggen ineba Sangma parakangaha.Ia program o Sangma VHC-IEC ni ki∙tap aro VHC app ko oprake on∙angan baksa VHC, TB aro Meghalaya Health Insurance Scheme (MHIS) o nambate dake chu∙sokgiparangna mande ra∙ani chin gita upadi lekkarangkoba sualangaha.
