September 12 tarikni walo, Tura Rongkhon Songgital jabol galram biapo bilsi 20 ong∙gipa me∙chikko pulisrang bilongbee doke saknaatani bidingo kobor ra∙timgiparang me∙chikko sandiange baditana kakket ong∙a ine sing∙sandianiko dakangaha.
Me∙chikni agananigitade ua uni ripeng skarang baksa walni somoio ringe cha∙e roaha ine ku∙chake ra∙angaha jeon me∙chik sakgni aro me∙asa sakgni donga ine ma∙sina man∙aha. Uamangni roengmiting somoio nirok sandianiko dakenggipa pulis dolrang Bolero gari gipoko sakgittam re∙bae me∙asa saksako jak sokechengaha aro iako nike me∙asa sakgnide kate chakaha.
Me∙asa sakgnini katanga bakan pulisrang me∙chik sakgniko jak sokna a∙bachengaha jeon saksako botolchi skoo dokpretaha. Me∙chikrangni pulisrangko thanachina rimna aganon batesa nokchi re∙angchina uamangko aganskaaha ine u∙iataha.
Ia ong∙a obostani bidingo Araimile thana ni pulis officerrang sing∙sandianiko dakna Ballonggre songona ua me∙chikni dongenggipa nokona re∙angaha. Pulis officerrangni sing∙anina ua pilak ong∙a obostako talate on∙angaha aro thanachi janapejani gimin uko sing∙on ripengskarang re∙na gong∙ja ine aganangskaaha. Uko dokgipa pulisrangni kosako badi ka∙dogenma ine sing∙on, ua me∙chik ka∙jawa ine aganchakangaha aro pulisrang uni badi ka∙jawa ine aganchakaniko lekkao see on∙a ge∙etaha.
Pulis dolrangni agananigitade Rongkhon Songgital jabol galdamo bang∙a manderang churing chupeke roanina songni manderang janapani gimin uamang gisepo biapona re∙ange nirokeaniko dakronga ine u∙iatangaha. Indake ong∙genchimoba pulis dolrang uko kragija doke sate roani ong∙ja aro an∙chi pari nikpiloba uko maina hospital-chi sanna bannaniko dakna rimangja ine social media rango manderangni sing∙doaniko nikna man∙angskaaha.
