Adita salrangna skang Byrnihat-o gari a∙sel ong∙anio saknaako man∙gipa A∙chik me∙chikma saksa jean bilsi 45 ong∙gipa Garobadha Gongglanggre songoni Ma Rina Momin ko sanna bannaniko dakna We Are The World dolrang dakchakaniko on∙enga ine parakataha.
A∙sel ong∙anio saknae dongenggipa me∙chikmako nike, saksa Shillong-o donggipa Carla R Sangma sing∙sandianiko daken, Shillong NEIGRIHMS Hospital-ona sanna bannaniko dakna rimangaha. Uko sanna bannanio dakchakgipa darangba dongjani gimin political dilgiparang, chong∙motan MLA-rangni dakchakaniko am∙ahaoba darangni dakchakanikoba man∙jaha. Uko sanna bannanio dakchakgipa dongjani gimin Carla Sangma Social Media-rango noksarangko mesokate aro a∙selrangko janapatanichi manderangni dakchakaniko bi∙atan baksana nokdangni manderangnaba koborko on∙ataha.
Duko ga∙akenggipa me∙chikmani obostako Social Media-rangoniko niksoe, We Are The World dolni member-rang an∙tangtangni je man∙paako gilchimonge ua me∙chikmako sanna gita tangka paisarangko ra∙ange on∙eaha ine u∙ina man∙soaha. Rinna Momin ko da∙onaba Shillong NEIGRIHMS Hospital-o sanna bannaniko dakengkua ineba koborna parakataha.
