National Education Policy 2020 ko ra∙gatna re∙mikkanganiko dontongjawa ine NEHU ni Vice Chancellor Prabha Shankar Shukla mijal salni bako koborna parakangaha. Re∙baenggipa somoio Academic Council baksa chanchirimanio neng∙nikanirangko nikgenchimode NEP ko nambata bewalo ra∙gatna man∙agita uarangko name chanchirime chel∙atna jotton ka∙anggen ine Shukla, Meghalaya College Teachers’ Association (MCTA) baksa tom∙ani ja∙mano aganangaha. NEP ko name ra∙gatna man∙agita MCTA ko University baksa bakrimpachina mol∙molanikoba dakangaha. July 12 tariko NEHU ni u∙iatgipa chittigita 110 gipa Academic Council ni ja∙ku de∙anio NEP ko ra∙gatgen ine parakataniara nikchrake togiani ong∙a ine MCTA dolrang uko ra∙galpilna dabianiko dakenga.
VC ni aganatskaanigitade 2020 September 11 tariko 104 gipa Academic Council tom∙anio NEP ko ra∙gatna chanchisoani dongaha ine parakangaha. Niamrangko Academic Council maming saloba a∙bachenggipa tarikko nie ra∙gatja ineba ua agandapangaha. Uamangni niamrangko ra∙bagipako Executive Council rang ru∙utatgija sakantini namgnina tarironga ine Shukla parakangaha. Da∙ona kingking NEHU baksa bakrimgipa college rangni Principal rangoniko NEP ko ra∙gatna neng∙nikani bidingo maming chittiko man∙soa dongkuja ine Shukla u∙iatangaha. 2023 July 21 tariko NEP ko ra∙gatna tom∙anio bang∙bata bakrimgipa collegerangni Principal rang bakko ra∙angaha aro ia re∙mikkanganikoba ra∙chakangaha ine Shukla u∙iataha. 110 gipa Academic Council tom∙anio NEP ko ra∙gatna neng∙nikanirangko 111 gipa Academic Council tom∙anio nipiltaie namdapatna chanchianggen ineba ua agandapangaha.
NEP 2020 ko ra∙gatani bidingo University ni gitaba pilak nanganirangna dakchakaniko on∙a ra∙chakenga aro pilak neng∙nikanirangko mikkango done kam ka∙anggen. Iarang pilakan sakantini namgnina dakenggiparang ong∙a aro poraia skiani gadangrangko songadam nokadamrangona namdapataniko ra∙banasa dakenga ine Shukla aganangaha.
