Da∙al salni bako a∙dok sorkarini Cabinet tom∙anio ming bonga chanchirimaniko ra∙chakangaha. Skanggipa chanchirimanio, a∙doko chiring chibisik aro chi man∙ani gipin a∙damrangko nirok simsake rakkinagita State Water Informatics Centre ko Department of Water Resources ni dilanichi a∙bachengatna sorkari tik ka∙angaha. Ia Centre chibisikrangni bidingo name tale ma∙sie ra∙e nanggipa u∙ianirangko jak donggipa department rang baksa bakrime Ministry of Jal Shakti ni on∙gimin niamrango pangchake chu∙sokatna kamrangko ka∙anggen ine parakataha.
Gnigipa chanchirimanio, a∙dok sorkarini bijoli bikotna, batanggimin somoirango soi ka∙gimin projectrang jekai Kynshi-I Hydro Electric Power Project aro Upper Khri Stage-I aro Stage-II Project rangko dontongatna tik ka∙angaha. Ia ge∙gni projectrangko private party rang baksa bakrime kam ka∙na rai donggenchimoba tangka paisarangnigita meligrikgijani a∙sel aro jako ra∙gipa companyrang somoigita kamrangko chu∙sokatjanina ia projectrangko dontongatangaha. A∙dok sorkari gipin companyrangko sandie ru∙utgija somoini gisepon ia projectrangko a∙bachengatna kamrangko ka∙anggen ineba u∙iataha.
Gittamgipao, National Law University of Meghalaya (Amendment) Bill, 2023 ko ra∙gatna, donggimin Act o pangchake nanggipa kattarangko on∙dape aro niamrangko namdapatna University ni Finance Committee na ku∙pattianirangko on∙angaha. Apsan daken ia tarigimin niamrangko a∙dokni Assembly oba parakatanggen.
Brigipao, Shillong ni Police Headquarter o Engineering Wing ko a∙bachengatna ku∙pattianiko on∙angaha. Meghalaya Police nigita a∙doko adita rika cho∙anirang dongahani gimin Engineering Wing ko ra∙gatanio mikkangchi uarangko namdapatna Departmentni kamrangko jako ra∙e ka∙angna man∙gen ine parakataha.
Bon∙kamgipao ming gittam niamrangko State Assembly ni re∙baenggipa Autumn Session o ra∙gatna tik ka∙angaha jeon Rajitlal University Act 2011 ko ra∙galna, Meghalaya GST Act 2017 aro Meghalaya Medical Council (Amendment) Bill, 2023 ko namdapatna chanchirimaniko dakanggen ine parakataha.
