Bijoli bikotna dingtang dingtang cholrangko ra∙banagita miksonge, a∙dokni adita biaprangko MeECL nianiko dakangenga ine Chairman cum Managing Director Sanjay Goyal parakangaha. Meghalaya a∙doko dingtang mancha sal-oniko bijoli bikote jakkalna man∙agita re∙baenggipa somoirango solar park rangko songna miksonganiko u∙iatangaha. Solar park rangko dal∙gipa gadango a∙bachengatnagita salko chu∙onge man∙gipa biaprangko nanga maina a∙dokni gimik biaprango chu∙ongagita salrangko man∙rongja ine Goyal aganangaha.
MeECL da∙o dipet Jaintia Hills a∙jani damgni biaprangko nie donangaha jeon ge∙prak solar park-o 10 Megawatt (MW) mangnigita bijoli bikotani kamrangko a∙bachengatna miksongani gnang ine ua aganaha. Biaprangko nie dongenchimoba ia projectrangko da∙o dipet jako ra∙e kam ka∙na gong∙giparang dongkujaenga ine Goyal u∙iataha. Apsan daken Garo Hills oba ia solar parkrangko a∙bachengatna sal chu∙ongagita man∙gipa biaprangko am∙sandianirangko dakangenga ineba ua parakangaha.
