South Garo Hills District Cricket Association (DCA) aro Shillong Cricket Association (SCA) bilsi 19 ni ning∙o ong∙gipa me∙chikrangni Inter District Cricket Tournament kal∙atenggipao da∙al salni bako uamangni kal∙anirango chegipa ong∙angaha. South Garo Hills DCA, North Garo Hills DCA baksa Salpara o Zone 2 ni Group B ni ning∙o kal∙anio SGH chegipa ong∙angaha aro SCA West Jaintia Hills DCA baksa Ri-Bhoi ni Umbuda o Zone 1 ni Group B ni ning∙o kal∙anio SCA chegipa ong∙angskaaha.
NGH bisil godoanio chegipa ong∙e dokchengna gita tik ka∙e over 25.2 o 66 run rangkosan man∙aiaha jeon SGH dolrang extra rangko bang∙e man∙anichi over 13.5 ni gisepon NGH dolko nengrabee amatnagita man∙angaha. Unbaksana SCA baksa WJH DCA ni gisepo kal∙anio Jayshree Singh wicket ko ga∙akatgija 105 run ko man∙e chu∙gimik 149 run rangchi amchepataha.
Knal salni bako bon∙kamgipa kal∙aniko Zone 1 ni Group A ni ning∙o East Khasi Hills DCA baksa Ri-Bhoi DCA kal∙anggen aro Zone 2 ni Group ni ning∙o South Garo Hills DCA baksa East Garo Hills DCA bon∙kamgipa kal∙aniko dakangskagen.
