India a∙songni bilsi 16 ni ning∙o ong∙gipa robol kal∙gipa dolrang South Asian Football Federation (SAFF) U-16 Championship 2023 ko Bhutan, Thimpu-ni Changlimithang Stadium o bon∙kamgipa kal∙anio goal 2 ko chipe Bangladesh ni kosako chegipa ong∙angaha. Skanggipa goalko Bharat Lairenjam chipaha aro gnigipa goalko Levis Zangminlun chipanichi India dol nengrabee chenagita man∙angaha. Bangladesh dolrang jotton ka∙begenchimoba goal sa koba chipnagita man∙rikjae sirikskaaha.
Indiani robol kal∙gipa dolko skigipa Ishfaq Ahmed ni dilachi name kal∙nagita dakchakangaha. Group A ni ning∙o changgni kal∙anio Bangladesh aro Nepal ko goal prak chi amataha. Unbaksana Maldives baksa semi-final kal∙anio goal 8 ko chipe amchepataha aro Maldives goal sa koba chipnagita man∙rikjaha. India dolrang kal∙a gimiko darang dolni jakchi goal sa ba chipatako man∙gijan bon∙kamgipa kal∙aniona kingking sokdoe chegipa ong∙aha.
