Dadenggre Sub Division-ni ning·o donggipa Feedback Energy Distribution Company Limited (FEDCO) company Phulbari jolo jakkalenggipa bijoliko name nirok simsakjaengani gimin, Phulbari FEDCO Office-ko September 11 tarikoni chipe donatna tik ka∙giminko FKJGP Chibinang Circle, ra∙galpilaha ine parakataha.
FKJGP Chibinang Circle-ni President Binoth A. Sangma-ni parakatani gitade, Phulbari aro Chibinang jolrango 230 bijoli Voltage-rangko jakkalna nanggenchimoba, 120 bijoli voltage-rangkosan jakkalna man∙aiani gimin, nokrango chu·onga gita bijoliko jakkalna man·jae neng∙nikanirangko man∙ronga. FEDCO office-ko FKJGP ni chipe donna tik ka∙ahaniko nike, FEDCO companyrang Chibinang-o tarigipa Power Grid-ko taraken a∙bachengataha aro bijolikoba tik ong∙e jakkalnagita man∙engaha ine Binoth Sangma parakataha.
Chibinang Power Grid-ko taria matchotani ja∙manoba bijoliko watgija adita somoirangnan donangaha ine u∙ianagitaba man∙aha. FEDCO company aro Power Minister AT Mandol manderangni neng∙nikanirangko masichake aro uamangni dabianiko knachake Chibinang Power Grid-ko a∙bachengate on∙ahani gimin FKJGP ni President mittelpilani kattarangko parakataha.
