Da∙al salni bako ICFAI University, Tura campus skanggipa changna Alumni Meet ko ong∙atangaha. Ia Alumni Meet-ona ICFAI University Meghalaya-ni Vice Chancellor Dr. Alicia Gatphoh tom∙aniona sokbae bakko ra∙angaha. ICFAI University Turani Advisor aro campus ni Head in charge Dr. VS B. Sangma tom∙aniona sokbagiparangna rimchaksoani kattarangko aganangaha.
Ia programo university-o poraienggipa chatro chatrirang doka damani aro git ring∙anirangko nitobee dakmesokaniko nikangaha. Unbaksana tom∙aniona re∙bagipa gitcham chatro chatrirangna an∙tangtangni janggi tanganio maikai chu∙sokgiparang ong∙aha uko aganparakna somoikoba on∙angaha. Una agreba gitcham chatro chatrirangna memento rangko gisik ra∙ani chingita uamangna suale mittelaniko dakangaha. Bon∙kame, ia program ni bako jatni dakbewal rikbewalo pangchake doke dame, chrok mesae aro dingtang dingtang jatni dakmesokanirangkoba ong∙atangjolaha.
