BJP ni gitcham dilgipa HM Shangpliang party oni ong∙katani ja∙mano BJP dolko a∙doko mikkangchi dal∙angnagita maming niksamsoani cholrang dongja ine parakangaha. Party ni ning∙o bilko jakkalsretanirang aro dilgiparangni gisepo meligrikna man∙gijaniko nike ua BJP oni ong∙katna nangao ga∙akaha ine Shangpliang agantalate on∙angaha. Partyni dal∙gipa dilgiparangni gisepo indakgipa neng∙nikanirang aro meligrikgijanirang dongjagenchimode ua BJP dol baksa bakrimna maming neng∙nikani dongjachim ine agandapangaha.
Party ko ia bewalo dilaniara dolni tang∙doaniko bilgriatgipa ong∙a aro manderangni namgnina chanchigipa ong∙genchimode bilko jakkalsretna maming dakeba cholko on∙a nangja ine Shangpliang aganangaha. Shangpliang ni aganani gitade, BJP dolni State President Ernest Mawrie saksan jako ra∙e dolko sason ka∙e kam ka∙gipa dilgipa ong∙a ine matnangataha. Mawrie ni party ko dilanio namen mikkang nitea gnang kamrangko ka∙ronga aro gipin dilgiparangni kattarangko ua knachakgija darangnaba u∙iatgija an∙tang namnikagita dakronga ineba Shangpliang agandapangaha. Party ni ia bewalrangni a∙sel aro Conrad Sangmani dilaniko namnike ua BJP doloni ong∙kate NPP o napna ja∙ku de∙angaha ine Shangpliang kobor ra∙timgiparangna agantalate on∙angaha.
