Meghalaya Cricket Association ni bilsi 19 ni ning∙o ong∙gipa me∙chik bi∙sarangna NGH a∙jani Salpara songo ong∙atenggipao robol gona aro dokna changbegipa Marme M. Sangma ni ga∙subee kal∙anichi South Garo Hills District Cricket Association run 57 mangchi Tura District Cricket Association ko amataha.
Ia kal∙susaanio SGH skanggipa dokchakatangaha aro uamang 30 over on∙aoniko 143 run rangko man∙angaha. Uamangni kal∙anio Marme Sangma 33 run rangko man∙e bang∙bate score man∙gipa ong∙aha. Unbaksana Janicka R. Marak, Jaylynn R. Marak nambate kal∙giparang ong∙angaha. Robol gogiparangoni Awesa G. Momin, sak 3 wicketrangko 31 run o ga∙akate nambate kal∙gipa ong∙angskaaha.
Apsandaken Ri-Bhoi a∙jani Umbuda songo Inter District Cricket kal∙susaanio Shillong Cricket Association 15 run rangchi West Khasi Hills DCA ko amatskaaha.
