Re∙baenggipa 2024 bilsini Lok Sabha election-o susaanio NPP party-an Shillong parliamentary ni biap-o cheanggen aro Tura parliamentary seat-koba man∙piltaigen ine mijal salni bako Cabinet Minister Rakkam Sangma parakataha. Uni kobor ra∙timgiparangna aganani gitade, NPP re∙baenggipa MP election o ge∙gni seat-na dakgrikengon Shillong seat-o NPP-an chegen ine ka∙dongsoenga. Je mandeba ong∙china Shillongo bang∙a neng∙nikanirang dongani gimin gisik seng∙gipa dilgipako seokna nangenga ine Sangma aganangaha.
Manipur a∙dokni obostarangko janape PA Sangma gita NE ni neng∙nikanirangko niate Parliament o janape agangriknagipako nangenga aro Shillongni manderang Parliament ona nambatgipa mandeko seoke watatode nambegen ine Sangma aganangaha. Shillongni Congress MP Vincent Pala ni kamrangko toate, da∙ona bate nambate kamko ka∙na cholrang dongkuenga aro Parliament o janape a∙dokni manderangna namgnirangko ra∙banagita amgen. P A Sangmani siani ja∙manonin a∙dokni namgnirangna agan janapanirangko knaani komiangaha. Shillongo bang∙a seng∙gipa manderang gnang jeon nambatgipako a∙dokni manderangni palo agan golpogrikna seoke watatna nanga ine Sangma aganangaha.
NPP Shillong seat o susaaniko dakna mandeko ru∙utgija somoini gisepon u∙iataniko dakanggen unbaksana Turani seat na Agatha K Sangma ko seoktaigen jeon NPP nengrae chetaina man∙gen ine Sangma parakangaha. NPP ko a∙bachengataoni bilsi 12 san ong∙kuoba, Garo Hills-o sak 24 oni sak 18 MLA rang NPP ni ong∙a aro Garo Hills ni manderang gitcham MP kon seoktaigen ine uamang ka∙dongsoenga ine Sangma agandapangaha.
