BJP ni dilgipa HM Shangpliang ni partyo bakrimaoni ong·katani ja·mano, BJP dolni President Ernest Mawrie ni kosako, party-o kam ka·rimskarang uni partyo sason ka·ani bewalrangko namniktokjaenga ine BJP dolni saksa gitchambatgipa dilgipa AL Hek parakataha. Gitcham BJP dilgipa HM Shangpliang kam oniko watna skang uko gronge Mawrie ni partyko an·tang saksanchi chalaina am·anina suk ong·gijani kattarangkoba parakangaha. Una agreba BJP dolni Mahila me·chik dolrangba Shangpliang ni agana gitan uni party ko an·tangari chalaina am·anirangna suk ong·gijanirangko parakataha.
Partyni gisepo tom·tome aro nangrime kam ka·anio dilgiparangosa pangchakani gimin neng·nikanirangko namatnagita dal·batgipa dilgiparang baksa golpogrikanirangko dakchengesa ja·ku de·angna man·gen ineba Hek talatanio on∙anga. Unbaksana Mawrie ko party ni dilgipana seokani somoirangko dingtangatna ma∙mongni BJP dilgiparangosa pangchakanggen ine ua agandapangaha.
