Da∙al salni bako Tura songjinmao (L) P A. Sangma ni bilsi 76 gipa atchiani salko gisik ra∙e manianio 7 gipa P A. Sangma Memorial Lecture ko Tura ni District Auditorium o North Eastern Hill University (NEHU), Tura baksa P A. Sangma Foundation bakrime ong∙atangaha. Ia tom∙aniona Chief Minister Conrad K. Sangma aro The Print-ni Founder aro Editor in Chief Shekhar Gupta mongsonggipa sokgipa ong∙e program o bakko ra∙angaha. Unbaksana (L) P A. Sangma ni jikgipa Ma Soradini K. Sangma, James K. Sangma, Agatha K. Sangma, NEHU Tura-ni Vice Chancellor Prof. PS Shukla aro NEHU-ni campus incharge Prof. Sujata Gurudev ba tom∙aniona soke bakko ra∙angaha.
Ia tom∙anio saksa politics ni dilgipa maikai dilgipani kamko aro jakkandilaniko skie on∙agita ‘The Print’ ni Editor Shekhar Gupta aganprakangaha. Apsan daken Tura songjinmani adita dingtang dingtang college rangoni jekai Tura Christian College, P A. Sangma Foundation, Tura Government College-ni NCC dolrang, Don Bosco College, Tura ni chatro chatri rang re∙bae P A. Sangmani janggi tangani aro uni nambegipa kamrangni gimin agananirangko knatime bakko ra∙angaha.
