Selsella, Kalchengpara, Rochonpara, Balachanda aro janapgimin songrangni wilwilao donggipa biaprango chu∙ongagita songre songgabatna gari gorarang dongjani gimin A∙chik Students’ Welfare Association (ASWA) dolrang Transport Minister Sniawbhalang Dhar na chittiko see mol∙molataha.
Shillong aro Guwahati ona salanti re∙gipa garirang dongjani a∙selo ia songjinmarango poraienggipa chatro chatrirang, office o kam ka∙giparang aro bading chiwale cha∙giparang kamtangtangona re∙na dona neng∙nikaniko man∙engani gimin Meghalaya Transport Corporation (MTC) Bus ko ra∙bae on∙china chittio janapataha.
Iani a∙selo dingtang dingtang a∙bao jekai skia poraia, badingchiwalani, kam ka∙ani aro jolni chu∙gimik tang∙doaniko ra∙onenga ine uamang janapangaha. Ia jolrango songdengenggipa manderangni neng∙nikaniko olgrokatna Transport Minister ko uamang Selsella oni Guwahatiko napake Shillong re∙gipa MTC bus ko ra∙bae on∙china didiangaha. Ian manderangna namgipa subitako on∙ani aro altubee songre songgabatna dakchakbeani ong∙en ine ASWA dolrang parakangaha.
