Meghalaya a∙doko bilsini gitalgipa skie ra∙aniko dakaoni sal 45 mang ong∙piloba chu∙gimik ge 75 oni ge 22 NEHU ni ning∙o ong∙gipa collegerang bilsi brini undergraduate course ko ra∙chakna man∙jawa ine teachers’ union baksa jegalaniko dakuenga ine officialrang mijal salni bako koborna u∙iataha. Ia ge 22 college rang skanggipa semester ni class rangko donggija aro assignment rangkoba ka∙gija gitalgipa policy ko ra∙gatanina jegalaniko dakenga ine Meghalaya Teachers’ College Association (MTCA) ni General Secretary Dr. Airpeace W Rani u∙iataha. Ia skigipa dolrang July 12 tariko NEHU ni ning∙o ong∙gipa collegerango NEP 2020 ko ra∙gatna nangchongmota ine u∙iataniko on∙gipako ra∙galchinagita NEHU ni Vice Chancellor (VC) Prof. PS Shukla ko mol∙molataha.
Iani gimin chanchirimna July 21 tarikon jotton ka∙angaha indiba Shukla-ni jrip dongaiani a∙selo ia ra∙chakna man∙gija jegalani ja∙kuko August 1 tarikoni a∙bachengataha ine Rani aganaha. Ia meligrikgijaniko bon∙atani cholde NEP 2020 ko ra∙gatna nangchongmota ine VC ni u∙iatgiminko ra∙gale gitcham 6 semester ni course ko ja∙rikpilataiosa man∙aigen ine MTCA ni dilgipa aganataha. July 12 tariko u∙iataniko on∙gipao NEP ko ra∙gatna 110 gipa NEHU Academic Council ni tik ka∙e Executive Council ni ra∙chakgipa ong∙a jekon Academic Council maidake aro basako NEP ko ra∙gatnagita nanga uni gimin maming u∙iatani dongja ine Rani agandapaha.
NEP 2020 ko ra∙gatanichi bilsi brini undergraduate programme ko NEHU aro uni ning∙o ong∙gipa collegerangna mikkangchini namgnina unbaksana skia poraiako nambatatna tarisamsona gita ta∙rake ra∙gataniko dakatenga ine NEHU ni VC uamangni jegalanina aganchakatskaaha. Unbaksana jegalaniko dakenggipa collegeni skigiparangko ia mamlani bidingo agan golpogrike meligrikgijaniko bon∙atna namgipa ja∙kuko de∙na ine MTCA ko okamatanikoba VC dakangaha.
