Shillongni Avenues dolrang APEX ine done salbongana Pilot Programme ong∙atgipa August 25 tariko Pioneers Secondary School, Baghmara o bon∙kame ong∙ate matchotangaha. Ia bon∙kamgipa programme ni salo South Garo Hills a∙jani DC Shivansh Awasthi ba bakko ra∙angaha. APEX ko a∙bachengataniara bang∙a skulo poraienggipa chatro chatrirangni skul re∙aniko dontongani, agangolpogrikna sapgijani aro Science, Mathematics subject rango gisik nanggijaniko nambatatna kam ka∙enggipa ong∙a. Ia training programme o mongsongbate agangolpogrikani, Science ni a∙bao chanchiani aro an∙seng baljoke dongani gimin mikkangchina chadamberangna changa sapaniko skie on∙angaha.
Ia programme ko ong∙atanio Mathematics aro Science rango gisik nangatani aro ua subjectrangna kenanirangko komiate ka∙dongatna, gisik a∙ning bite dingtanggipa cholrangko chanchianina skie on∙aniara NEP ni dakbewalko ja∙rikani ong∙a ine katchaan baksa DC parakataha. Chu∙gimik manderangni namgnina dakbewal rikbewalrangko, aganritingbaanirangko, daka rikanio manderangni gamchataniko bi∙sarangni gisiko dongkame ja∙rikchinaba agan skie on∙angjolaha. Ia programme ko Baghmara-ni United Baptist Secondary School oba ong∙atangjolaha jeon a∙jani chatro chatrirang sak 200 mang ong∙nasipile bakko ra∙angaha. Mikkangchi re∙baenggipa ja rango dingtang dingtang skulrangoba chadamberangni namgnina ia Avenues ni ong∙atgipa Pilot Programme ko a∙jao man∙taina ka∙dongsoenga ine DC aganangaha. Apsan daken ia pilot programme ko West Khasi Hills aro West Jaintia Hills a∙jarangoba ong∙atangaha.
