West Bengal a∙dokni Kolkata songjinmao August 24 oni 27 tarikona ong∙atanggipa “Just Do” Basketball Referee Camp o Meghalaya ni sakbri referee rang bakko ra∙angaha. Ia camp o bak ra∙na Meghalaya Basketball Association (MBA), Tura District Basketball Association (DBA) aro East Khasi Hills District Basketball Association (EKH DBA) oni Kreliath G. Marak, Jessica T. Sangma, Francis Hasdak aro Queenty Mary Nongrum seokako man∙e Meghalaya a∙dokni palo skie ra∙na re∙angaha.
Ia Basketball Camp ko International Basketball Federation (BFI) ni referee Atanu Banerjee unbaksa Raj Narayan Patro, BFI ni nirokanio Majerhat Eastern Railways aro Rakhi Sports Club baksa nangrime ong∙atangaha. ‘Just Do’ Camp India a∙songo basketball referee-rangna skie on∙aniko dake on∙gipa skanggipa camp ong∙a aro ia campona India a∙song gimikni sak 21 referee rang re∙bae bakko ra∙angaha. Camp ni bon∙chotgipa salo re∙bae bakko ra∙anggipa referee rangna certificate aro momento rangkoba Camp Director rang on∙angaha.
