Re∙anggipa antio Turao songdonggipa saksa kenbegnigipa aro a∙songo nikronggijagipa meningoencephalitis ba taningko ding∙atgipa sabisiko man∙e siangani gimin sanna bannanio nirokgiparangna jajrenganiko on∙enga. Sianggipa mande bilsi 43 ong∙gipa education official ko sabisi man∙a bakan Tura hospitalona sanna bannaniko dakna gita ra∙baaha. Uni saani namjabatrikrikani gimin uko Guwahati ona watate ICU o donata ja∙man ua janggi galaha ine parakataha.
Sianggipa mande office ni kam nanganina Kerela a∙dokona re∙angaha aro re∙bapilmiting somoio ua ramaon sana a∙bachengaha ine u∙iataha. Ia sabisiara virus, bacterium, parasite ba gipin micro-organism rangni a∙sel ong∙a aro sabisi man∙ao mesokgipa chinrangara be∙en ding∙ani, gisiko jajaatani, chigala, be∙en saani jekon sanna bannaniko dakgija dongode siaonaba sokata ine u∙iataha. Ia sabisi ramramari batrikrikgipa ong∙jagenchimoba a∙jao nikronggijagipa sabisi ong∙a ine jako ra∙e sanna bannaniko dakenggipa doctorrang parakataha.
Unbaksana Health Department o sanna bannaniko nirokgipa dolrang Tura songjinmao dengue sabisiko man∙anio batroroenganina tarisamsoaniko dakenga ine u∙iataha. Ia sabisi batanggipa bilsi gnio a∙jao giproroaniko man∙aha jeon jilenggipa wakrangni sambao dongani a∙sel ong∙kataha ine u∙ina man∙aha. Dengue sabisiko WGH o man∙gipa manderang da∙o sak 21 mangnigita donga. Iarangan matburungrangni dongchakramrangko nosto ka∙e ge∙a gamaniko dakna buringrangko bangbang rongtalatani a∙sel ong∙na ama ine parakangaha.
