Pa. Sonaram R. Sangma ni Chang 107 gipa siani salko gisik ra∙e manianio hai an∙ching kan∙dikbee uni bimchipe aro on∙kange A∙chik jatrangko begal olaoniko naljokatna kam ka∙aniko da∙al salni bako nipilatna.
Sonaram R. Sangma Garo Hills ni Nachirongdik jolni Rongrokgre songo 1867 mangni somoirango atchiaha. Sangma an∙tangni poraia skianiko matchote sorkarini kamko Public Works Department-o Mohurer ni gadango ka∙angaha.
PWD officeo ka∙miting somoio Sangma Tura oni Rongrenggre ni ramako tarie on∙angaha jean Simsang chibima ni rikkamo donggipa songrang jekai Chokagiri, Rangmalgiri aro Dolwagiri jolo songdonggipa manderang ua ramako ka∙sae Sonaram sorok ine aganronga. Ua PWD ni kam ko 1899 bilsio watangaha.
Pa. Sonaram R. Sangma A∙chik rangoni skanggipa politics ni dilgipaba ong∙a ine an∙ching poraianirango u∙inagita man∙a. British rangni A∙chikrangko sason ka∙e begal olataniko dakengmiting somoio Pa. Sonaram jattangni nokkol ong∙e dongako nimatjae A∙chik jatko jakgitel ong∙atnagita janggi tangko on∙kange kamko ka∙angaha. Jensalo British rang uko so∙otna ka∙mikkenataniko on∙on, “Angko so∙ote Manda chio galatode, angni manggisi banona balpakanga ua biaponan Garoland ong∙skana nanggen” ine Sangma ni aganchakgipa katta da∙alona kingkingba uni matsramgipa dilgipani gunko mesoka.
Pa Sonaram R. Sangma Bakrapur songo 1916 bilsini August 27 tariko siangaha aro da∙onaba bilsiantin uni nambegipa kamna gisik ra∙e ua biapo manianiko dakrongenga.
