Re∙anggipa July 24 tariko CM Office Tura o so∙sojengjeng ong∙gipao rim∙a man∙gipa manderangko watpilchinagita Mother’s Union dolrang Chief Minister ko Shillong o gronge mol∙molangaha ine koborko man∙soaha. Garo Hills ni adita bakoni jinmani palo re∙ange grongegipa Mother’s Union ni dilgiparangara Dalu unit ni General Secretary Archana Ch. Marak, Selsella unit ni Robilline M. Marak aro Williamnagar unit ni Lemina Ch. Marak ong∙a.
Ia kajia ong∙anio chu∙gimik sak 51 manderangko pulis dolrang rim∙aha jekon maming a∙sel ong∙a gri ma∙gipa dilgiparang watpilchinagita mol∙molangaha. Koboro parakatanigitade Conrad Sangma ia manderangko watpilna sikaniko janapangaha aro iani bidingo ua chanchianirang gnang ine u∙iatangaha. Unbaksana ku∙monganiko on∙agita pilak A∙chik MLA rangkoba ku∙cholsan ong∙china aro Chief Minister kosan nichake dongaigija re∙mikkangchina mol∙molangaha. A∙chik jatni ku∙mongani dongjani gimin uamang suk ong∙gijaniko parake sakanti jatska manderangko ku∙cholsan ku∙mongrimpana didiangjolaha.
