North Garo Hills a·jao Dainadubi jolni Bangsi Apal songo jakkalgija galchipe donenggipa BSNL tower-ko tarie on·china ba gitalko songe on·chinagita Dainadubi Circle Youth Organisation (DCYO) jolo songdonggiparangni palo East Garo Hills a·jani William Nagar BSNL Sub Divisional Engineer na memorandum ko on·angaha. Ua jolo songdongenggipa manderangni aganani gitade BSNL tower ni nosto ong·anichi wilwilao donggipa nokdangrang neng∙nikanirangko man·enga ine parakataha.
Unbaksana ia nosto ong∙gimin tower o mikka kimpretaniko ra·chakgipa kol name dake kam kajahani a·sel mikka riprapani somoio wilwilao donggipa nokrango nangchake nokona sringgipa bijolini silitingrangko nosto ong·aona sokatrongenga ineba janapangaha. Ia obosta ong·ani a·sel songdongenggipa manderangna mikkangchi bang·a neng·nikani aro a·sel ong·anirangko chagrongnaba donga ine memorandum-o janapangjolaha. Ia ong·enggipa obostani gimin DCYO dolrang Sub Divisional Engineer ko tarake niate kamko ka·chinagita mol·molangjolaha.
