Meghalaya State Council of Technical Education (MSCTE) ni ong∙kamnagipa Secretary aro Meghalaya Board of School Education (MBOSE) ni Executive Chairmanko songe on∙a gita a∙dok sorkari ra∙chakna tik ka∙angaha. A∙dokni monsonggipa damgittam a∙jarango chong∙motan Shillong, Tura, Jowai aro gipin a∙jarangonaba Polytechnicko ra∙baenganiko niate a∙doko MSCTE na ong∙kamnagipa Secretary ko songna nangchongmotaniko Law Minister Ampareen Lyngdoh koborna parakataha.
Ru∙utgija salrangni gisepo da∙o ong∙enggipa Directorate of Higher Technical Education (DHTE) ni Director kamoni neng∙taknasienga aro ukon skanggipa changna chu∙gimik ong∙e ja 24 na MSCTE ni Secretary ni kamko jako ra∙na cabinet seokangaha. Kamoni neng∙takmangipa IFS officer CP Marak ko ja 12 na MBOSE ni Executive Chairman na seokanganiko dakangskaaha. Unbaksana Captain Williamson Sangma Technical Universityko Captain Williamson Sangma State University ine biming mingjitnaba ra∙chakangaha ine u∙iataha.
