Chadamberangni gisepo dingtang dingtang a∙bao kam ka∙e an∙tangna dake cha∙ani gitalgipa cholrangko chanchianiko ra∙bana aro an∙tangtangni nanganirangna biltango ka∙donganiko on∙a Entrepreneurship Encouragement and Development Programme-ko salgnina Don Bosco College of Teacher Education Hall-o ong∙atangenga. Ia program-ko Re∙mikkang Youth Club nigita District Administration West Garo Hills, Don Bosco College Tura, Meghalaya Basin Management Agency (MBMA) aro Prime Hub baksa bakrime ong∙atangenga.
Programni a∙bachengan salo West Garo Hills a∙jani DC Jagdish Chelani mongsonggipa sokgipa ong∙e chadamberangna agan ku∙pattianirangko dakangaha. Chadamberang sakantian songsalo neng∙nikanirangko mikkangchake an∙tangtangni changa sapaniko jakale mikkangchi bading chiwalanio chu∙sokgiparang ong∙na DC didianiko on∙angaha. Ia program o bang∙a chatro chatrirang, skigiparang, officer rang aro dingtang dingtang gadangni manderang gisik nangbee bako ra∙enga.
