West Garo Hills a∙jani Allagre, Selsella aro Kherapara songrango Pradhan Mantri Surakshit Matritva Abhiyan (PMSMA) nigita Medical Department o sanna bannaniko on∙enggiparang programko ong∙atangaha. PMSMA, dingtangmancha an∙o donggiparangna koros nanga gri bi∙sa an∙pakna skang porikka ra∙aniko on∙a ma∙mong sorkarini ra∙bae on∙gipa mingsa chol ong∙a. Iako July 31 tariko 2016 bilsio Prime Minister Narendra Modi an∙o donggipa me∙chikrangna sanna bannanio simsakaniko on∙a oprake on∙angaha.
Ia programko ong∙atanio an∙o donggipa ma∙giparangna aro bi∙sani an∙seng baljokanina porikka ra∙aniko dakangaha. Ia program-ona bang∙a ma∙giparang re∙bae an∙tangtangko porikka ra∙na medical department-o kam ka∙giparang baksa gisik nangbee bakrimaniko nikangaha. Unbaksana da∙ororo giproroenggipa mikronni sabisiko champengsona dakna nanggni aro dakna nanggijagipa bewalrangko agantalate on∙anganikoba dakangaha.
