South Garo Hills a∙jani Chokpot Assembly ni ning∙o rikenggipa Chokpot Degree College, Integrated Block nok aro dongchakani gnanggipa skul nokni rika cho∙anirangko a∙dokni MP Agatha K. Sangma nirokeaniko dakangaha. Unbaksa Chokpot ni MLA Sengchim N. Sangma, West Garo Hills ni District President Dr. J D. Sangma aro Block President Sengmen N. Sangma nirokanio dongpae bakko ra∙angaha. Rika cho∙ani kamrang a∙bachenganiko nike Agatha Sangma Chokpotni manderangna dingtangmancha katchapaaniko parakangaha.
Ua somoio Chokpot ni Nokpante skulonaba napakangjole skulni chatro chatrirang baksa golpogrike uamangni mikkangchi namgnirangna skie on∙angan baksa chu∙sokanina re∙mikkangna didiangaha. Poraienggipa adita chatro chatrirangna gamchatbegipa upadi lekkarangkoba MP suale on∙anganiko dakangaha. Ian Chokpotni manderangna uamangni janggi tanganio dingtanganiko ra∙bana aro a∙jani tang∙doanina dakchakani ong∙anggen ine parakangaha.
