Niamni a∙palo Dareng chibimaoniko rong∙te bikotaniko dontongatchina Chokpot Area Vigilance Committee (CAVC) a∙dokni skotong Minister Conrad Sangma-ko gronge memorandumko on∙angaha. Jolo songdongenggipa manderang changni chang ia kamko dontongatna agangenchimoba niamgri rong∙te bikotaniko dakuenga ine koborna parakataha.
Chief Minister uamang baksa golporimanio iani bidingo niatna ku∙chuakangaha aro Environment Protection Act, 1986 ni ning∙o niamgri kam ka∙ani ong∙ode dontongatna man∙gen ine parakangaha. CAVC dolrang Chokpot MLA Sengchim Sangmakoba gronge ia kamrangni bidingo ma∙siataniko dakangaha. Ia kamrangko Sangma nirok sandina uamangna ku∙chakangaha aro mikkangchi indakgipa kamrangko ka∙taijachina raka ja∙kuko de∙anggen ine aganangaha.
