South West Garo Hills a∙jani Zikzak Block ni ning∙o donggipa Kangkangre PMGSY ramako tarigija galchipe don∙ani gimin wilwilao donggipa manderang an∙tangtangni neng∙nikaniko aro suk ong∙gijajaniko Civil Society A∙chik Welfare Organisation (CSAWO) dolrangna parakangaha.
Ia ramako tarigija galchipe don∙aniko nike CSAWO dolrang biapona re∙ange ramako nirok sandiako dakeaha. Ia ramako 2019 bilsini October 17 tariko work order ko man∙e tarinagita a∙bachengataha aro ia kamko matchotataniara 2020 bilsini July 17 tariko ong∙enchimoba tarigija galchipe don∙aha. Kamko jako ra∙gipa contractor ni bimingara Sahidul Rahman ong∙a ine koborna parakataha.
Iani bidingo CSAWO dolnigita singsandianirangko dakangnagita RTI koba ka∙angna tik ka∙aha ine CSAWO HQ Ampati Central Executive Commitee ni President Tryans Ch Marak u∙iatangaha.
