East Garo Hills a∙jani Williamnagar pulis station-ni patok ning∙ao bilsi 50 ong∙gipa me∙apa saksa sukrobar walo an∙tangko kadingdee siaha ine koborna parakataha. Dosi dakgipa Jitman Sangma Rongsak songoni ong∙a aro uko bilsi chu∙ongkugijagipa me∙chik bi∙sako til∙ekanina nokdangni manderang badi ka∙doangaha. Uni kosako badi ka∙doani ja∙mano Chiading pulis dolrang dosi dakgipako rim∙aha ine u∙iataha. Jitman Sangma A∙chik samrangko on∙aniko dakgipa ojaba ong∙a aro bi∙sako samrangko jakkale mikmalatesa til∙ekaha ine nokdangni manderang u∙iataha.
Badi ka∙aniko man∙a jaman Jitman Sangmako bristibar salo pulisrang rim∙ange William Nagar pulis station-ni patoko am∙sandianirangko dakna donatchengaha. Am∙sandianirangko dakmiting somoio, Jitman Sangma ni jakchi ong∙gija dakako man∙gipa sakgipin bilsi sokkugijagipa bi∙sa uni kosako gnigipa changna badi ka∙aniko Sukrobar salo dakangtaiaha. Walni 9:30 baji mango nirokaniko dakna re∙ange nieani somoio dosi dakgipa mande an∙tangni gangipa cholako budu tarie kelki kosako kadingdee siakosa nikeaha ine SP Siddarth Ambedkar u∙iataha.
