Batanggimin chango GHADC ni MDC rang aro gipin kam ka∙giparangni kosako Nilberth Marak Lokayukta o badi ka∙doanganiko dakangaha. Iani bidingo mijal salo skanggipa changna bichal ka∙anirangko dakangaha. Bichal ka∙ani somoio dosi dakgipa sak 13 sakprakkon tangka gong hajal 50 ko gamate, uamangoni dosi dakgipa sakgni manderangni jamin chakaniko man∙e Court jaminko on∙angaha. Lokayukta court o badi ka∙anio bilsi 2017-18 o ge 47 projectrangna tangka gong crore sako sakgni contractor na chamatgipako jakkalsretaha aro projectrangko matchotgija ka∙anina dosi donga ine parakangaha.
Chamgimin projectrangoni Balupara gopram nokko rikgipa aro Daljagreo chi chimongchakram biapko rikgipakosan matchotataiaha ine parakataha. GHADC ni tangkarangko jakkalsretanina GHADC ni gitcham CEM Boston Marak, gitcham Executive Member Goera Marak, Jimbirth Marak, Levastone Sangma, Righteous Sangma, Rupert Sangma, Kendick Marak aro Dhormonath Sangma, gitcham Deputy Executive Member Winnison Marak, gitcham MDC Ismail Marak, Secretary Hewingson Sangma aro sakgni Contractor rangni kosako Meghalaya Lokayukta Court dosi donga ine parakangaha.
