Selsella o PWD Sub-Divisional Office ko bosaie on∙china ASWA dolrang Deputy CM na chitti sedoata

West Garo Hills a∙jani Selsella songo Sub-Divisional Office of PWD (Road) ko bosaie on∙china Achik Students’ Welfare Association (ASWA) dolrang Deputy CM Preston Tynsong na mol∙molani chittiko sedoataha. Rika cho∙ani aro rama jal∙angrangko namdapatna sorkarini namgipa kam ka∙anirangko ra∙chakenba dingtangmancha uamang Selsella jolni ramarangko tarie on∙a nangnikaniko parakataha. Somoigita ramarangko tarianiko matchotna aro namdapatna, project rangko kam ka∙na PWD Sub-Divisional Office donggijanichi neng∙nikaniko on∙enga ine uamang janapataha. Selsella damsa bading chiwalani aro janggi tangani cholrangko manderangna on∙gipa damsa biap ong∙a ine ASWA dolrang aganangaha.
PWD Sub-Divisional Officeko Selsella o bosaie on∙genchimode ramarangko rika cho∙anio ta∙rakgipa ja∙kurangko de∙e kam ka∙na amgen aro manderangni nangnikaniko u∙ian baksa a∙ani obostarangko ma∙sie nambata ramako tarianio dakchakani ong∙gen ine uamang aganangaha. Unbaksana songsalni janggi tanganiko tang∙doatani, bading chiwalaniko namdapatani aro manderangna namgipa cholko on∙aniba ong∙gen ine ASWA agandapangaha. Rama jal∙angrang namode skia poraianiko tang∙doatna, sanna bannaniko namdapatna aro re∙a do∙anio altue songre songgabatna man∙a ine ASWA janapataha. Ia bidingo niatpachina ASWA dolrang Deputy CM na mol∙molaniko on∙ate mikkangchi sorkari baksa bakrime kam ka∙na miksonganikoba chittio janapataha.