August jani 15 tariko India a∙songni jakgitel ong∙ani salko EGH-ni Rongjeng songo maniani somoio adita skulrang parade re∙jome susaanio bakko ra∙angaha. Ia parade-ko susaanio Vivian’s Vivid Academy School ni commander Jagrimra N. Marak ni dilanichi bilsignina joljol bakko ra∙gipa skulrangoni Vivian’s Vivid Academy nambate dakmesokgipa ong∙e chegipa ong∙aha.
Upper Rongjeng Silchang gittimni Jagrimra N. Marak , Beril Sangma aro Lt. Tanuja N. Marak-ni depante ong∙a. Ua lekka poraianio inditana namgipa ong∙jagenchimoba una kam on∙giminko ua pangnan gisik nange aro bimchipe kamko ka∙e chu∙sokatronga ine u∙iataha.
2023 bilsini Aug 15 tariko Jagrimra N. Marak battanggimin bilsirangogitan ia bilsiba skultangni parade re∙jomanio dolko dilgipa ong∙e bakko ra∙angtaiaha. Ua apsan salon uni ma∙gipa bilongbee sae biaptango donggenchimoba ua an∙tangni skulna on∙kange doltangko jakwatgija krenge dilangaha. Rasonggribee Jagrimra N. Marak ni ma∙gipa a∙gilsakko wate tom∙tomao neng∙takna gita re∙angaha. Ia chatroni skultangna on∙kange aro bimchipe kamko ka∙anina adita manderang aiao inmanpilan baksa de∙mittele una rasongko on∙angaha.
