Meghalaya aro Assam a∙dokni Regional Committee rang West Jaintia Hills aro Assam a∙doko tong∙sagrik ga∙akgipa Khanduli songni Assam pulis outpost o sima ario meligrikgijani bidingo chanchirimaniko dakangaha. Ia tom∙aniko Meghalaya a∙dokni Deputy Chief Minister, Chairman Sniawbhalang Dhar aro Assam a∙dokni Water Resource Minister Pijush Hazarika dakdilangaha. Pnar aro Karbi jat dolgni ni seokako man∙giparang uamangni neng∙nikanirangko committee ni member rangna u∙iatnagita memorandum ko on∙angaha. Tom∙ani ja∙mano Regional Committee rang bakrime Kharbi Anglong Authonomous Council (KAAC) ni rikgimin Entry Tax Gate biaponi nirokanganikoba dakangaha.
Ia tom∙e chanchirimani miksonganiara dolgni member rangni gisepo ka∙donggrikaniko on∙a aro uamangni nangnikarangko chu∙sokatna tom∙e chanchirimaniko ong∙atangaha ine Dhar koborna parakataha. Neng∙nikaniko chagrongenggipa manderangni gisepo tom∙tomani aro meli nangrimgrikani gamchatanikoba Dhar ku∙pattie on∙angjolaha. Tom∙aniko matchotani somoio dolgni committee rang a∙doktangtangni skotong Minister na niamo pangchake uano songdongenggipa manderangni nangnikaniko aro ku∙pattianiko on∙angchina Hazarika u∙iataha.
