Re∙baenggipa bilsi bongani gisepo, gital a∙bachenge on∙gipa Chief Minister’s ELEVATE programni ning∙o, 20,000 business rangko chalaigiparangna dakchakangnagita a∙dok sorkari tik ka∙angaha. Gital business rangko a∙bachengna miksongenggiparangna uamangni nanganirango a∙dok sorkari dakchakaniko on∙anggen ine India a∙songni jakgitel ong∙ani salko maniani somoio Chief Minister Conrad Sangma parakangaha.
Ia program ni ning∙o entrepreneur rang, jinma bakrime daknagipa, songni organization rangna aro songsalni manderangna business ko a∙bachengna 35 oni 75 percent mangnigita dakchakaniko sorkari on∙gen ine aganangaha. Ia program ni gita sorkari dingtang dingtang bank rang baksa bakrime business ko a∙bachengna subsidy ko on∙gen ineba Sangma u∙iatangaha.
