India a∙songni jakgitelani salo WGH District Museum Tura o adita mikgital jatni bewal aro dakarikaniko dakmesoke mesokanganiko nikangaha.
Ia dakmesokaniko Department of Arts & Culture dingtangmancha gimaenggipa jatni bewalrangko manderangna u∙iatna aro museum ona re∙bae nina gisik nangatnagita mikrakatiniko on∙a miksonge ong∙atangaha.
A∙chikrangni dakarikanirang songantio gimaanganiko nike pagitcham ma∙gitchamrangni gamchatgipa jatni bosturangko museum ona manderang re∙bae nina cholko on∙angaha.
Ia mikgital museum ni dakmesokanio dingtang dingtang jatni dakarikanirang jekai kil doka, re∙king doka, chu cheka, wa∙ding chita, jatni ganding chinding, doka dama, sol∙a repa, noksa sala aro dingtang dingtang jatni gamchatgipa ostrorangko mesokangaha.
Ia dakmesokaniko jatni dakarikaniko ripingna aro chadamberangna jatni bewalko gamchate ra∙china didianiko on∙a miksonge ong∙atangaha. WGH a∙jao ian jatni ganding chinding aro pilak dakarikaniko mesokgipa museum-ba ong∙enga aro program-ko ong∙atgiparangni agananigitade ian A∙chikrangna namgipa cholba ong∙enga ine parakataha.
