Baljek airport oni Kolkata ona sildorenggita songreaniko a∙bachengatna Joint Movement Committee for Corridor from Balurghat-Hili – Mahendraganj-Tura (JACCBHMT) ma∙mong sorkarini Union Minister of Civil Aviation Jyotiraditya M Scindia ko didiangaha. Sildorengko a∙bachengatna man∙anichi Northeast a∙ja aro West Bengal a∙dokni Balurghat-Hili ni tourism aro kajina man∙aniko baridapatna amgen ine uamang chittio janapanagaha.
Bang∙a Northeast a∙jarango re∙a doani namjani a∙sel sildorenggita India a∙songni gipin a∙dokrangona songrena altubatgipa rama ong∙a. Unbaksana Meghalaya a∙dokni manderang Tura oni Kolkata ona salgittam songrena nangaonikoba namen komiatgen ine JAC dolni ni convenor Naba Kumar Das janapataha.
Sanna bannaniko daknagita a∙dokni manderang Kolkata ona re∙aniko bang∙en niknagita man∙a indiba namgipa rama jal∙angrang dongjani a∙selo bang∙a neng∙nikanirangko man∙enga. Uandaken bang∙bata salrango a∙jani manderang Kolkata-chi sanna banna niko dakna re∙on chel∙bea ramarangko re∙na nangaona ga∙ake ramarango janggi galaona sokronga. Ia neng∙nikaoni naljokaniko man∙a gita uamang Tura oni Kolkatta ona Balurghat gita sildoreng-ko bilatchina didian baksa mol∙molaniko dakangaha, ine Das aganangaha.
A∙jao Baljek Airport-ko rika cho∙aniko dakna gita 1995 bilsio ma∙mong sorkari tangka gong 12.52 crore rangko chamataha aro ia airport ko 2008 bilsio oprake on∙angaha. Baljek Airport ko oprake on∙ani ja∙manoba da∙ona kingking ia airport-o sildorengrangni bilaniko nikna gita man∙kujaenga ine Das aganangaha.
