Batanggimin somoio West Garo Hills a∙jani Rongram Block ni ning∙o donggipa Dachimagre songo bilsi 12 ong∙gipa bi∙sa saksa achak chikako man∙e siangaha. Sianggipa bi∙sako anti-rabies biji su∙anirangko dakjaha, unbaksana achakoba anti-rabies biji su∙anirangko dakgijani a∙selo indakgipa obosta ong∙aha ine u∙iataha.
Ia koborrangko man∙e West Garo Hills District ni District Veterinary Officer noktango jilenggipa achakrangko Tura Veterinary Dispensary, Brahmipara, (Bamonpara) ona rimange tangka paisa nanggija bilsio changsa vaccine ba biji su∙anirangko dakchina gita didianiko on∙angaha. Ia biji su∙aniko pring 8 baji oni atam 2 baji ona dakanggen aro ia bijiko su∙anichi achakna, nokgipana aro manderangna naljokataniko ra∙bagen ine ua u∙iataniko on∙jolangaha.
