Sorkarini dakdilenggipa “Har Ghar Tiranga” ko dal∙batatna Tura Headquarter ni 120 BN CRPF sipairang Commandant Pramod Kumar Singh ni dilanichi Tura songjinmao bike rally ko ong∙atangaha. Azadi ka Amrit Mahotsav nigita India a∙songni jakgitel ong∙ani bilsi 75 ga∙dapaniko gisik ra∙na cultural programkoba ong∙atangaha jeon chadamberangni git ringanirangko nikangna man∙aha.
Robibar sal ong∙e mikka jimbee wagenchimoba chadamberang ia rally ona bak ra∙na re∙baanikoba nikangna man∙angaha. Bike rally ko Commandant Pramod Kumar ni jakchi Dakopgre CRPF camp o oprake on∙angaha. Ia rally ko ka∙anganichi manderangko a∙songna ka∙sana gisiko nangatna aro India ni National Flag ni bidingo mikrakataniko on∙a miksonge ong∙atangaha.
