August jani 11 tariko ACHIK dolni Labenn Ch. Marak, Bernita Marak aro GSMC ni Balkarin Marak mikkangchi uamangko patoko donatgen ine chanchichipe jamin ra∙e okna man∙agita dorgasto seaniko Meghalaya High Court ra∙chakna jegalataha. Unlawful Activities Prevention (UAP) Act ni section 43D (4) ni niamo pangchake dosi donga ine rim∙ako man∙gipa manderangko section 438 Act nigita ra∙chakna man∙ani dongja. Rim∙ako man∙gipa manderangnasa section 438 ko jamin ra∙na jakkala ine Justice W. Diengdoh parakangaha.
Am∙sandianiko dakna officerrang gnang aro ia kamni bidingo Court jakdangdikani dongjawa ine parakataha. Dorgasto galgiparangni kamko jako ra∙enggipa Counsel S Deb ni agananigitade uamang Mini Secretariat ni ningꞏo tomꞏanio bak raꞏgenchimoba aꞏpalo soꞏsojengjeng ongꞏanio maming bak dongja ine janapatskaaha. July 24 tariko ong∙a obosta niamni a∙palo ong∙a aro section 2 (o) UAP Act o napa ine Advocate General aganangaha. Aꞏdokni meli nangrimani, naljokataniko ka∙mikenatani aro mandeko so∙otna jotton ka∙aniara section 15 (1)(b)/16 ni niamo pangchake uamangni dorgasto galaniko UAP Act, 1967 section 43D (4) ni ning∙ao ra∙chakna man∙jawa ine Advocate General parakataha.
