A∙dokni police department-o nambate kam ka∙na man∙na gita Superintendent of Police (SP)-ni biapo ong∙enggipa sakantikon uamangni kam aro biaprangko apjitatna a∙dok sorkari mijal salni bako rai on∙angaha.
West Garo Hills a∙jani SP Vivekanand Singh Rathore-ko 3rd MLP Battalion Sahbsein-ni Commandant biapo ona apjitataniko dakna u∙iataniko on∙angaha. Unbaksana North Garo Hills a∙jani SP Shailendra Bamaniya-ko South Garo Hills a∙jani SP ni biapo donataha aro Shillong songjinmao Traffic-ni SP ong∙enggipa Dr. Dara Aswaghosh-ko 2nd MLP Battalion, Goeragre ona Commandant ni biapona apjitataha. South Garo Hills a∙jani SP Abraham T Sangma-ko West Garo Hills a∙jani SP ni biapona donatskaaha.
Una agreba 2nd MLP Battalion-ni Commandant ong∙enggipa Bruno A Sangma-ko North Garo Hills a∙jani SP ni biapona apjitataha aro 3rd MLP Battalion-ni Commandant ong∙enggipa Kamakhya Prasad-ko Shillong Traffic-ni SP ni biapona apjitatskaaha.
